बीकानेर,राउमावि बाडेला रै मांय आज सावण तीज रै मौके माथे स्टाफ, टाबरां अर गाँव रा मानीजता लोगां मिल’र सैंकड़ों रूँख लगा’र धरती रो सिणगार करयो। पर्यावरण प्रभारी सीताराम ’सितारा’ बतायो’ कै आपणी संस्कृति रै मांय रूंख नै देवता रो दरजो मिल्योड़ो है। संसार री एकली इसी संस्कृति है जकी में धरती नै मां मान`र उणरो मान राखण सारू सिणगार करण नै रूँख लगावण री जकी पुराणी परंपरा रैयी है, बाडेला में ’हरियाळो राजस्थान’ रै मौके पर इण परंपरा नै पाछी जीवंत करण रो ओ जोरदार प्रयास है। रूँख नै कड़ूंबै रो सदस्य मान`र बिंरो पाळण-पोषण करणे रो ओ संकळ्प परकृति अर मिनख रै मेळ नै मजबूत करण री एक कोशिश है। आपां तो पेड़ री पूजा सनातन सूं करता आ रैया हां विज्ञान अबै हांकरयो है के पींपळ सगळा सूं बेसी ऑक्सीजन देवै। इण अवसर माथे संस्थाप्रधान विपिन कुलहरी, सरपंच प्रतिनिधि हेमाराम खिलेरी, पूर्व सरपंच नेताराम गोदारा, एसडीएमसी अध्यक्ष चुनाराम गोदारा, अशोक डांगी, डॉ. राकेश, गोपाल तिवाड़ी, नानुराम खिलेरी, जीवण राम राईका, भूपसिंह ढूकिया, बालुराम, जयलाल मीणा, सुशीला शर्मा, ममता गुर्जर, मांगीलाल, ओमप्रकाश, सोनम मीणा, नोरतन मल, बबीता सहित मोकळा लोग मौजूद रैया।
Author
